जळगाव प्रतिनिधी
भुसावळ शहरातील तापी नगरात राहणाऱ्या एका ६५ वर्षीय वृद्धाला बँकेचे व्यवहार घरपोच करून देऊन चांगले रिटर्न मिळवून देण्याचे आमिष दाखवत तब्बल १९ लाख ४०५ रुपयांची धक्कादायक घटना उघडकीला आली आहे. याप्रकरणी भुसावळ शहर पोलीस ठाण्यात दोन जणांविरोधात गुन्हा दाखल करण्यात आला आहे.
मिळालेल्या माहितीनुसार, शहरातील तापी नगरमधील प्रदीपसिंह प्रतापसिंह परदेशी (वय ६५) हे वृद्ध आपल्या परिवारासह वास्तव्याला असून ते सेवानिवृत्त आहेत. दरम्यान, १० मार्च २०२३ ते ६ डिसेंबर २०२३च्या दरम्यान जळगाव येथे राहणारे संदीप चौधरी व सोनाली चौधरी यांनी प्रदीपसिंह परदेशी यांना बँकेचे व्यवहार घरपोच करून देऊन चांगले रिटर्न मिळवून देऊ, असे सांगितले. त्यानंतर त्यांचा विश्वास संपादन करून त्यांच्याकडून कॅश, ऑनलाईन व चेकद्वारे तब्बल १९ लाख ४०५ रुपये स्वीकारून त्याच्या मोबदल्यात बनावट व हुबेहूब दिसणारे कागदपत्र तयार करून त्यांच्या घरी आणून अपहार केल्याचे तक्रारीत म्हटले आहे.
दरम्यान, आपली फसवणूक झाल्याचे लक्षात आल्यानंतर प्रदीपसिंह परदेशी यांनी २५ नोव्हेंबर रोजी दुपारी २ वाजता भुसावळ शहर पोलीस ठाण्यात धाव घेऊन या संदर्भात तक्रार दिली. त्यानुसार संशयित आरोपी संदीप चौधरी व सोनाली चौधरी यांच्या विरोधात गुन्हा दाखल करण्यात आला आहे. या घटनेचा तपास पीएसआय विजय गायकवाड करत आहेत.
