समाजएकतेचा भव्य सोहळा : मुक्ताईनगरात भोई समाज मंगल कार्यालयाचे लोकार्पण

संत शिरोमणी भीमा भोई यांच्या १७८ व्या जयंतीनिमित्त उत्साह; आमदार चंद्रकांत पाटील यांची २० लाखांच्या सुशोभीकरण निधीची घोषणा

स्टार भारत लाईव्ह एक्सप्रेस प्रतिनिधी

प्रतिनिधी : संत शिरोमणी भीमा भोई यांच्या १७८ व्या जयंतीचे औचित्य साधत मुक्ताईनगर शहरात सामाजिक ऐक्य, सांस्कृतिक बांधिलकी आणि समाजविकासाचा प्रेरणादायी संगम पाहायला मिळाला. भोई समाजासाठी आमदार निधीतून साकारण्यात आलेल्या भव्य मंगल कार्यालयाचे उद्घाटन आमदार यांच्या हस्ते उत्साहपूर्ण वातावरणात पार पडले.

सुमारे ५० लाख रुपये खर्चून उभारण्यात आलेले हे मंगल कार्यालय जळगाव जिल्ह्यातील भोई समाजासाठीचे सर्वात मोठे सभागृह मानले जात असून, समाजाच्या सामाजिक, सांस्कृतिक आणि शैक्षणिक उपक्रमांसाठी ते महत्त्वाचे केंद्र ठरणार असल्याची भावना उपस्थित मान्यवरांनी व्यक्त केली.

कार्यक्रमाच्या प्रारंभी संत शिरोमणी भीमा भोई तसेच यांच्या प्रतिमांना मान्यवरांच्या हस्ते पुष्पहार अर्पण करून अभिवादन करण्यात आले. कार्यक्रमाच्या अध्यक्षस्थानी जळगाव जिल्हा भोई समाज मंडळाचे अध्यक्ष एस. ए. भोई हे होते. व्यासपीठावर तालुकाध्यक्ष तथा नगरसेवक छोटू भोई, राजेंद्र वानखेडे, बबलू कोळी, गणेश टोंगे, निलेश शिरसाठ, मुकेश वानखेडे, पंकज कोळी, पंकज राणे, अफसर खान, मधुकर भोई यांच्यासह विविध क्षेत्रातील मान्यवर उपस्थित होते.

यावेळी बोलताना तालुकाध्यक्ष छोटू भोई यांनी समाजाला सक्षम व्यासपीठ उपलब्ध करून दिल्याबद्दल आमदार चंद्रकांत पाटील यांचे आभार मानले. “समाजाच्या पाठबळामुळेच मला नगरसेवक होण्याची संधी मिळाली. आज उभे राहिलेले हे मंगल कार्यालय समाजाच्या एकतेचे प्रतीक आहे,” असे ते म्हणाले.

आमदार चंद्रकांत पाटील यांनी आपल्या भाषणात समाजसभागृह हे केवळ इमारत नसून सामाजिक प्रगतीचे केंद्र असल्याचे सांगितले. उपमुख्यमंत्री यांच्या नेतृत्वाखाली मतदारसंघातील सर्व समाजघटकांना न्याय देण्याचा प्रयत्न सुरू असल्याचे त्यांनी नमूद केले. तसेच मंगल कार्यालयाच्या सुशोभीकरणासाठी आणखी २० लाख रुपयांचा निधी देण्याची घोषणाही त्यांनी केली.

अध्यक्षीय भाषणात एस. ए. भोई यांनी या सभागृहाचा उपयोग केवळ विवाह समारंभापुरता मर्यादित न ठेवता ग्रंथालय, सांस्कृतिक कार्यक्रम, युवकांसाठी मार्गदर्शन शिबिरे आणि बालसंस्कार उपक्रमांसाठी व्हावा, अशी अपेक्षा व्यक्त केली. समाजाच्या नव्या पिढीला वैचारिक दिशा देण्यासाठी अशा केंद्रांची गरज असल्याचेही त्यांनी स्पष्ट केले.

कार्यक्रमात भोई समाज मंडळाचे शहराध्यक्ष प्रवीण भोई, उपाध्यक्ष मनोज भोई आणि युवक कार्यकर्त्यांनी आमदार चंद्रकांत पाटील यांचा सत्कार केला. तसेच मुक्ताईनगर पंचायत समितीच्या पहिल्या महिला सदस्य भारती छोटू भोई यांचाही गौरव करण्यात आला.

कार्यक्रमाचे सूत्रसंचालन प्रा. विनायक वाडेकर यांनी केले, तर आभार प्रदर्शन प्रवीण भोई यांनी मानले. या सोहळ्यासाठी महिला, युवक आणि समाजबांधव मोठ्या संख्येने उपस्थित होते. सामाजिक अभिमान आणि विकासाची नवी दिशा देणारा हा सोहळा मुक्ताईनगरमध्ये चर्चेचा विषय ठरला.