स्वतंत्र स्मशानभूमीच्या मागणीसाठी बावनबीर येथील बौद्ध समाज आक्रमक….!

स्टार भारत लाईव्ह एक्सप्रेस

प्रतिनिधी:- मुकिंदा गव्हांदे जळगाव जामोद

संग्रामपूर:- ९ जून २०२६
दहा दिवसांत निर्णय न झाल्यास तीव्र आंदोलनाचा इशारा तहसीलदारांना निवेदन सादर संग्रामपूर तालुक्यातील बावनबीर येथील बौद्ध समाजासाठी स्वतंत्र स्मशानभूमी उपलब्ध करून देण्याच्या मागणीने आता निर्णायक वळण घेतले असून, समाजबांधवांनी तहसीलदारांना निवेदन सादर करून तातडीने कार्यवाही करण्याची मागणी केली आहे. अनेक वर्षांपासून प्रलंबित असलेल्या या प्रश्नाकडे प्रशासनाचे लक्ष वेधण्यासाठी समाजाच्या वतीने एकत्रितपणे पुढाकार घेण्यात आला आहे. निवेदनात नमूद केल्याप्रमाणे, गावातील बौद्ध समाजाला अंत्यसंस्कारासाठी स्वतंत्र जागा नसल्याने मृत व्यक्तींच्या अंत्यविधीच्या वेळी अनेक अडचणींचा सामना करावा लागत आहे. ही केवळ जागेची समस्या नसून समाजाच्या मूलभूत अधिकारांशी आणि मानवी सन्मानाशी निगडित बाब असल्याचे समाजबांधवांचे म्हणणे आहे.
ग्रामपंचायत तसेच संबंधित प्रशासनाकडे यापूर्वी अनेक वेळा पाठपुरावा करण्यात आला. मात्र अद्याप कोणताही ठोस निर्णय झालेला नसल्याचा आरोप यावेळी करण्यात आला. त्यामुळे समाजामध्ये तीव्र नाराजी निर्माण झाली असून, प्रश्न सोडविण्यासाठी आता प्रशासनाने ठोस भूमिका घेण्याची गरज व्यक्त होत आहे.
बौद्ध समाजासाठी स्मशानभूमीची कायमस्वरूपी व्यवस्था करण्यासाठी शासकीय जागेची पाहणी करून आवश्यक ती प्रक्रिया तत्काळ पूर्ण करण्यात यावी, अशी मागणी निवेदनाद्वारे करण्यात आली. तसेच दहा दिवसांच्या आत सकारात्मक निर्णय न झाल्यास लोकशाही मार्गाने आंदोलन छेडण्यात येईल, असा इशाराही समाजबांधवांनी दिला आहे. यावेळी उपस्थित नागरिकांनी सांगितले की, गावातील सामाजिक सलोखा कायम राखण्यासाठी तसेच प्रत्येक समाजघटकाला समान सुविधा मिळण्यासाठी हा प्रश्न मार्गी लागणे आवश्यक आहे. प्रशासनाने या मागणीची दखल घेऊन तातडीने कार्यवाही केल्यास दीर्घकाळ प्रलंबित असलेला प्रश्न निकाली निघण्यास मदत होईल. निवेदन सादर करताना समाजातील पदाधिकारी, ज्येष्ठ नागरिक, युवक आणि विविध सामाजिक संघटनांचे प्रतिनिधी मोठ्या संख्येने उपस्थित होते. यामुळे या प्रश्नाबाबत समाजाची एकजूट आणि तीव्र भावना स्पष्टपणे दिसून आली. प्रशासनाने तातडीने दखल घेऊन न्याय द्यावा, अशी अपेक्षा बावनबीर येथील बौद्ध समाजबांधवांनी व्यक्त केली आहे……✍️