फुलगाव (वरणगाव) येथे प्रशासनाशी चर्चेनंतर सरपंचांचे आमरण उपोषण मागे
ग्रामविकासाच्या प्रलंबित प्रश्नांवर सकारात्मक आश्वासन; फुलगावातील उपोषणाची यशस्वी सांगता
वरणगाव | प्रतिनिधी
फुलगाव (वरणगाव) येथील ग्रामविकासाशी संबंधित विविध प्रलंबित प्रश्नांवर तोडगा काढण्याच्या मागणीसाठी लोकनियुक्त सरपंच श्याम फुलगांवकर व ग्रामपंचायत सदस्य सचिन पाटील यांनी सुरू केलेल्या आमरण उपोषणाची प्रशासनाशी झालेल्या सकारात्मक चर्चेनंतर सांगता झाली. संबंधित अधिकाऱ्यांनी न्याय्य मागण्यांवर सकारात्मक भूमिका घेतल्याने उपोषण मागे घेण्यात आले.
उपोषणस्थळी भेट देऊन आंदोलनकर्त्यांच्या मागण्यांची सविस्तर माहिती घेण्यात आली. त्यानंतर संबंधित प्रशासकीय अधिकाऱ्यांशी चर्चा करून ग्रामस्थांच्या न्याय्य मागण्यांवर सकारात्मक तोडगा काढण्याचे आश्वासन देण्यात आले. प्रशासनाकडून अनुकूल प्रतिसाद मिळाल्यानंतर सरपंच श्याम फुलगांवकर व सदस्य सचिन पाटील यांनी आपले आमरण उपोषण मागे घेतले. या निर्णयामुळे ग्रामस्थांमध्ये समाधानाचे वातावरण निर्माण झाले.
यावेळी लोकशाही मार्गाने मांडण्यात आलेल्या जनहिताच्या प्रश्नांना न्याय मिळावा तसेच ग्रामविकासाची कामे गतिमान व्हावीत, यासाठी कायम प्रयत्नशील राहणार असल्याची भावना व्यक्त करण्यात आली.
या प्रसंगी मा. राजेंद्रभाऊ चौधरी (माजी सभापती), राजेंद्र चौधरी (नगरसेवक, वरणगाव), नवनीत पाटील (शिवसेना तालुका प्रमुख), संतोष माळी (शिवसेना विधानसभा क्षेत्र प्रमुख), विलास मुळे, सुभाष चौधरी (शिवसेना तालुका सहसंघटक), निलेश ठाकूर (शिवसेना तालुकाप्रमुख), रवी कोल्हे, अक्षय बेंडाळे, राहुल बावणे, विनोद झोपे (नगरसेवक), नितीन चौधरी (थोरगव्हाण उपसरपंच) यांच्यासह शिवसेना-युवासेना पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
प्रशासन आणि ग्रामस्थ यांच्यातील सकारात्मक संवादामुळे आंदोलनाची शांततापूर्ण सांगता झाल्याने ग्रामविकासाची रखडलेली कामे लवकरच मार्गी लागतील, अशी अपेक्षा उपस्थित ग्रामस्थांनी व्यक्त केली.
