देऊळगाव राजा येथील ‘शिवद्वार गणेश मंडळा’तर्फे भव्य रक्तदान शिबिर; 71रक्तदात्यांनी केले रक्तदान
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा:‘रक्तदान हेच सर्वश्रेष्ठ दान’ आणि ‘रक्तदान म्हणजे जीवदान’ हा उदात्त संदेश देत येथील प्रसिद्ध शिवद्वार गणेश मंडळाच्या वतीने रविवार, दिनांक २० सप्टेंबर २०२६ रोजी भव्य रक्तदान शिबिराचे आयोजन करण्यात आले होते. सामाजिक बांधीलकी जपत आयोजित करण्यात आलेल्या या स्तुत्य उपक्रमात तब्बल ६० नागरिकांनी स्वयंस्फूर्तीने रक्तदान करून आपला खारीचा वाटा उचलला. या यशस्वी उपक्रमाबद्दल संपूर्ण परिसरातून मंडळाचे जोरदार कौतुक होत आहे.
माजी आमदार डॉ. शशिकांत खेडेकर यांची भेट
सकाळी ठीक १० वाजता या शिबिराला उत्साहात सुरुवात झाली. या दरम्यान जिल्ह्याचे लोकप्रिय माजी आमदार डॉ. शशिकांत खेडेकर यांनी शिबीर स्थळाला सदिच्छा भेट दिली. मंडळाच्या या सामाजिक उपक्रमाची पाहणी करून त्यांनी सर्व कार्यकर्त्यांचे कौतुक केले व रक्तदात्यांचे आभार मानले. “शिवद्वार गणेश मंडळ हे केवळ उत्सवापुरते मर्यादित नसून समाजसेवेचा एक आदर्श वस्तुपाठ आहे,” अशा शब्दांत त्यांनी मंडळाचा गौरव केला.
संतोष खांडेभराड यांचे खंबीर सहकार्य
देऊळगाव राजा शहरात ‘शिवद्वार गणेश मंडळ’ हे नेहमीच विविध सार्वजनिक व सामाजिक उपक्रमांसाठी ओळखले जाते. या मंडळाचे खंबीर पाठीराखे आणि माजी नगराध्यक्ष संतोष खांडेभराड हे नेहमीप्रमाणे याही वेळी मंडळाच्या पाठीशी खंबीरपणे उभे राहिले. मंडळाचा एक सक्रिय सदस्य म्हणून त्यांनी या संपूर्ण उपक्रमात मोलाचे सहकार्य केले.
अहिंसा मार्गावर उत्साही वातावरण
हे शिबिर श्री चौडेश्वरी चौक, अहिंसा मार्ग, देऊळगाव राजा येथे पार पडले. शिबिराच्या यशस्वीतेसाठी शिवद्वार गणेश मंडळाच्या सर्व पदाधिकारी आणि कार्यकर्त्यांनी अहोरात्र परिश्रम घेतले. शहरात या उपक्रमाची मोठ्या प्रमाणावर चर्चा असून, सामाजिक बांधिलकी जपणाऱ्या या मंडळाची ओळख ‘समाजसेवेचे केंद्र’ म्हणून पुन्हा एकदा अधोरेखित झाली आहे.
