दिल्ली दारू धोरण प्रकरणात मोठी घडामोड, अरविंद केजरीवाल यांची निर्दोष मुक्तता; राउज एवेन्यू कोर्टचा निकाल…!
स्टार भारत लाईव्ह एक्सप्रेस प्रतिनिधी
दिल्लीतील बहुचर्चित दारू धोरणाशी संबंधित प्रकरणात आज मोठी न्यायालयीन घडामोड झाली. राउज एवेन्यू कोर्ट यांनी दिलेल्या निकालात दिल्लीचे माजी मुख्यमंत्री अरविंद केजरीवाल आणि माजी उपमुख्यमंत्री मनीष सिसोदिया यांची निर्दोष मुक्तता करण्यात आली आहे. या निर्णयामुळे आम आदमी पार्टीला मोठा दिलासा मिळाला आहे आणि राजकीय वर्तुळात खळबळ उडाली आहे.न्यायालयाने निकाल देताना स्पष्ट शब्दांत सांगितले की, केवळ आरोप मांडणे पुरेसे नसते; त्या आरोपांना भक्कम आणि ठोस पुरावे जोडणे अत्यावश्यक असते. तपास यंत्रणेकडून सादर करण्यात आलेले पुरावे अपुरे आणि समाधानकारक नसल्याचे न्यायालयाने निरीक्षण नोंदवले. आरोपपत्रामध्ये अनेक त्रुटी असल्याचेही न्यायालयाच्या टिप्पणीतून स्पष्ट झाले.या प्रकरणात सर्वप्रथम राज्य उत्पादन शुल्क विभागाचे माजी आयुक्त कुलदीप सिंह यांना दिलासा देण्यात आला. त्यानंतर मनीष सिसोदिया यांना निर्दोष मुक्त करण्यात आले आणि शेवटी अरविंद केजरीवाल यांच्या सुटकेचे आदेश देण्यात आले. न्यायालयाच्या या क्रमवार निर्णयामुळे प्रकरणाचा संपूर्ण तपास आणि सादर केलेले पुरावे यावर प्रश्नचिन्ह उपस्थित झाले आहे.निकालानंतर माध्यमांशी संवाद साधताना अरविंद केजरीवाल भावूक झाले. त्यांनी आपल्या विरोधातील सर्व आरोप राजकीय सूडातून लावण्यात आल्याचा दावा केला. “माझी प्रतिमा मलिन करण्यासाठी हे सर्व केलं गेलं,” असा आरोप त्यांनी केला. तसेच त्यांनी पंतप्रधान नरेंद्र मोदी आणि केंद्रीय गृहमंत्री अमित शाह यांच्यावर गंभीर आरोप करत आम आदमी पार्टीला लक्ष्य केल्याचा दावा केला.दरम्यान, तपास यंत्रणांनी न्यायालयाच्या निर्णयावर असमाधान व्यक्त केले आहे. आदेशाचा सविस्तर अभ्यास करून उच्च न्यायालयात आव्हान देण्याचे संकेत देण्यात आले आहेत. त्यामुळे हे प्रकरण इथेच थांबणार नसून पुढील न्यायालयीन टप्प्यातही त्याची चर्चा रंगण्याची शक्यता आहे.दिल्ली दारू धोरण प्रकरणातील हा निकाल केवळ दोन नेत्यांसाठी दिलासा नसून देशाच्या राजकीय पटावर मोठा प्रभाव टाकणारा ठरू शकतो. आता पुढे उच्च न्यायालयात काय घडामोडी होतात, याकडे सर्वांचे लक्ष लागले आहे.
