कोचूर बु. येथील रेशन दुकान पुन्हा सुरू होणार!

मंत्रालयाचा महत्त्वपूर्ण निर्णय; तक्रारदाराचा अर्ज नामंजूर, जिल्हा पुरवठा अधिकाऱ्यांचे तहसीलदारांना निर्देश

स्टार भारत लाईव्ह एक्सप्रेस
जळगाव जिल्हा प्रतिनिधी : विनोद तायडे

रावेर : जळगाव जिल्ह्यातील रावेर तालुक्यातील कोचूर बुद्रुक येथील रास्तभाव धान्य दुकान पुन्हा सुरू करण्याचा मार्ग मोकळा झाला आहे. या दुकानाच्या परवान्याशी संबंधित प्रकरणात मंत्रालयाने दिलेल्या निर्णयानुसार, संबंधित दुकान पूर्ववत सुरू करण्यासाठी आवश्यक ती कायदेशीर कार्यवाही करण्याचे निर्देश जिल्हा पुरवठा अधिकारी, जळगाव यांनी रावेर तहसीलदारांना दिले आहेत. त्यामुळे या प्रकरणाकडे संपूर्ण तालुक्याचे लक्ष लागले आहे.

नेमके प्रकरण काय?

कोचूर बुद्रुक येथील रास्तभाव धान्य दुकानाचा परवाना श्रीमती अंजनाबाई भिवसन पाटील यांच्या नावावर आहे. रावेर तहसीलदारांच्या तपासणी अहवालात काही त्रुटी आढळल्याने संबंधित दुकानाचा परवाना तीन महिन्यांसाठी निलंबित करण्यात आला होता. या कारवाईविरोधात तक्रारदार श्री. कौतिक सुका मोरे यांनी नाशिक येथील उपआयुक्त (पुरवठा) यांच्याकडे पुनरीक्षण अर्ज दाखल केला होता.

या अर्जावर निर्णय देताना उपआयुक्त (पुरवठा), नाशिक यांनी २४ एप्रिल २०२४ रोजी तहसीलदारांचा निलंबनाचा आदेश रद्द केला होता. त्यानंतर या निर्णयाविरोधात तक्रारदार कौतिक सुका मोरे यांनी अन्न, नागरी पुरवठा व ग्राहक संरक्षण विभागाच्या मंत्र्यांकडे, मंत्रालय, मुंबई येथे दाद मागितली.

मंत्रालयाच्या निर्णयानंतर पुढील कार्यवाही

या प्रकरणात मंत्रालयात सुनावणी झाल्यानंतर संबंधित आदेश आणि सादर करण्यात आलेल्या कागदपत्रांच्या आधारे निर्णय घेण्यात आला. उपलब्ध माहितीनुसार, तक्रारदार कौतिक सुका मोरे यांचा अर्ज नामंजूर करण्यात आला असून, प्रकरणातील यापूर्वीच्या आदेशांबाबतही मंत्रालयाने निर्णय दिला आहे.

मंत्रालयाच्या निर्देशांनुसार जिल्हा पुरवठा कार्यालयाने पुढील कार्यवाही केली आहे. जिल्हा पुरवठा अधिकारी महेश चौधरी यांच्या स्वाक्षरीने जारी करण्यात आलेल्या आदेशानुसार, कोचूर बुद्रुक येथील रास्तभाव धान्य दुकान पूर्ववत सुरू करण्यासाठी आवश्यक ती कायदेशीर प्रक्रिया पूर्ण करण्याचे निर्देश रावेर तहसीलदारांना देण्यात आले आहेत.

शिधापत्रिकाधारकांना दिलासा मिळणार?

रेशन दुकान पूर्ववत सुरू झाल्यानंतर कोचूर बुद्रुक येथील शिधापत्रिकाधारकांना नियमित धान्यपुरवठा उपलब्ध होण्यास मदत होणार आहे. त्यामुळे दुकान सुरू करण्याच्या आदेशाची प्रत्यक्ष अंमलबजावणी कधी होते, याकडे लाभार्थ्यांचे लक्ष लागले आहे.

दरम्यान, दुकान पूर्ववत सुरू करण्याची कार्यवाही करताना संबंधित शासकीय आदेश, नियम आणि अटींचे पालन करणे आवश्यक राहणार आहे. मंत्रालयाच्या निर्णयानंतर स्थानिक पातळीवर होणाऱ्या पुढील कार्यवाहीला महत्त्व प्राप्त झाले आहे.